POLOS CAMIÑOS DA MOTIVACIÓN E DA XEOLINGÜÍSTICA: OS NOMES DA VÍA LÁCTEA

Abstract

Estudamos as denominacións da nosa galaxia no dominio lingüístico do galego e do portugués en Portugal e no Brasil, con base principal nos datos do Tesouro do léxico patrimonial galego e portugués (TLPGP). Analizámolas desde o punto de vista da motivación, moi arraigada en crenzas ancestrais con que a humanidade integrou ese fenómeno celeste en diferentes culturas ao longo de todo o mundo; esta perspectiva ten especial importancia no ámbito territorial do bloque lingüístico galego-portugués, ao se estender en áreas transoceánicas e superpoñerse a outras linguas e culturas. Analizámolas tamén desde o punto de vista xeolingüístico, mostrando a relación entre o afastamento do núcleo cultural orixinario, a vixencia ou perda da motivación e a mudanza na forma lingüística adoptada, sen esquecermos as posibilidades de novas motivacións adquiridas por hibridación nesa expansión territorial.